بابا نويل وسبايدر مان ودبدوب قبضوا على أكبر عصابة تجارة المخدرات في بيرو

ضابط لبس لبس دبدوب ومسك بلونة على شكل قلب وعلبة شوكلاتة ويافطة مكتوب عليها "انت سبب ابتسامتي".. سو كيوت يا جماعة والله.. وراح لبيت تاجرة مخدرات في دولة بيرو في أمريكا الجنوبية.. العاصمة ليما تحديدا في يوم الفلانتين.. وراح قابض عالست .. وساعدوا في دا ضباط تانية كانوا

 متنكرين برضوا بس في لبس مدني عادي.. وراحوا اعتقلوا السيدة على غفلة..ومعاها اتنين ستات مشتبه فيهم.. تخيل قاعد ديلر مالي مركزك قد الدنيا بتبيع مخدراتك لا بيك ولا عليك تلاقي نفسك بيتقبض عليك من دبدوب.. قمة المهزلة.. طب سطو مسلح ولا حاجة عليها القيمة شوية.. للدرجادي انا مهزأ؟ 
شرطي تاني بقى قبض على اتنين من تجار المخدرات.. بس كان متنكر في ايه.. في لبس بابا نويل.. وبرضو كان في دولة بيرو.. هو واضح ان دي سياسة الشرطة عندهم لدرجة ان السلطات أعلنت ان التنكر كان العامل الأساسي فى نجاح العملية.. احنا من غير بابا نويل مانسواش.. ودا عشان الظابط اتسلل وسط الاحتفالات بتاعت الكريسماس من غير ما حد ياخد باله ولا يشك فيه طبعا يعني بابا نويل معدي عادي..ووصل للبيت وقبض عليهم بالفعل.
وفي مدينة هوارال شمال ليما ظابط لابس برضو بابا نويل.. قبض برضو على اتنين من تجار المخدرات.. برضو ليلة راس السنة.. واضح جدا انها استراتيجية ناجحة.. مش عادية بس فعالة.. وهما مابيتعلموش من غلطتهم
العقيد والتر بالومينو، رئيس السرب الأخضر بالشرطة الوطنية، وضح أن اختيار اللبس ماحققش غرض التمويه بس، لكنه ضاف كمان لمسة ساخرة للعملية.. عقيد بيشجع اللعبة الحلوة نشتغل بس نتبسط..
وخلال المطاردة بين بابا نويل (اللي هو الظابط).. وتجار المخدرات.. راح سانتا كلوز متعصب وراح خابط الباب بالمطرقة بتاعته.. مكانتش قطن لأ كسرت الباب بجد.. ودي كانت الإشارة لبدء العملية .. وراح واقف الكولونيل بالومينو كدا وبعلو صوته قال.. "لقد أتى عيد الميلاد إلى حيوان الرنة الشرير" ان العملية نجحت يعني في سياق الاحتفال براس السنة وكدا... والاتنين اللي تم اعتقالهم اللي متسميين ب The Grinch و paneton 
اتقبض عليهم وهما معاهم كمية كبيرة من العبوات الصغيرة اللي فيها كوكايين وماريجونا..  
وماكنتش المرة دي هي اول مرة في استخدام الاستراتيجية دي من شرطة بيرو.. لكن كمان عملت كدا تاني بس كان في الهالوين.. لبسوا لبس مرعب بقى وكدا وراحوا قبضوا ع تجار المخدرات.. بجد إهانة اوي ليهم اللي بيحصل دا.. متخيلة شلبي سلوفان ولا أبو عنكبوت رئيس شركة المرعبين المحدودة مأنجج تاجر المخدرات كدا ورايح يرميه في البوكس.. 
وفي مرة تانية اتنكروا في لبس ابطال خارقين.. زي سبايدر مان وكابتن أمريكا وثور وكات وومان.. كاااات وومان.. رايحة تقبض على تجار مخدرات!! .. والعملية دي اتسمت مارفل .. لوجيك! .. قعدوا يلفوا في شوارع البلد كأنهم بيصوروا فيديو ترويجي للهالوين.. لحد ما وصلوا للبيت المقصود بتاع تجار المخدرات .. وراح الظابط اللي لابس كابتن أمريكا مكسر الباب فوق دماغهم بمطرقة صاحبه ثور.. وراح داخل هو واصحابه من فريق مارفل وعشر ظباط لابسين للأسف لبس شرطة عادي.. راح المجرمين مستقبلينهم باضحك ودعابة لطيفة وتنكر حلو وكل سنة وانتو طيبين هالوين سعيد.. بس ياعيني اتصدموا ان دا بجد مش افيه.. واتقبض على 4 عناصر إجرامية.. 3 رجالة وست.. وصادروا 3250 عبوة صغيرة من عجينة الكوكايين و 287 كيس كوكايين و 127 من الماريجونا.
تجار المخدرات بقى اكتشفوا اللعبة.. وراحوا قايلين مش هما بس اللي بيعرفوا يتنكروا.. احنا كمان بنتنكر.. وراحوا متنكرين بجد بقى.. عملوا عمليات تجميل جذرية في وشوشهم عشان يغيروا ملامحهم تماما ويبقى صعب التعرف عليهم.. وكانت واحدة من اكتر القضايا دي اثارة للجدل.. هي قضية خوان كارلوس راميريز أباديا، الملقب بـ "شوبيتا" سهلة اهي.. فاجئهم في جلسة محكمة بملامح مختلفة.. ودا كان بسبب عمليات التجميل اللي عملها شوبيتا عشان يغير فكه وعينيه وودنه ومناخيره عشان مايتمش التعرف عليه من الشرطة... وماكنش شوبيتا بس هو اللي عمل كدا عشان يتنكر.. لكن غيره كتير من المجرمين عملوا عمليات تجميل عشان يتنكروا من هويتهم الحقيقية عشان مايتقبضش عليهم.