أنا وقرة عيني قاعدين في فيلا التجمع دلوقتي .. شيرين عبد الوهاب تُعلن عودتها لحسام حبيب

شيرين رجعت لحسام
ايوة زي مابقولك كدا.. سموه قلب عشان قلاب... وبعد كل الازمات اللي شيرين مرت بيها مع حسام حبيب وتعاطيها المخدرات وانفصالهم ورجوعهم وانفصالهم ورجوعهم وانفصالهم اخر مرة في شهر 12 اللي فات بعد جواز استمر 5 سنين.. قولنا خلاص بقى جبرت على كدا.. تاخد شيرين استراحة محارب .. وهوبا مرة واحدة دابل كيك .. جماعة انا وحسام رجعنا.. انا وقرة عيني قاعدين في فيلا التجمع دلوقتي..
هل الاخبار دي حقيقية؟ هل شائعات؟ طب ازاي أصلا ممكن ترجعله ودي الطلقة التالتة ليهم بالفعل زي ما قالت شيرين بلسانها مع عمرو اديب؟!

شيرين مؤخرا كانت داخلة قصة حب جديدة مع دكتور.. بس القصة دي فشلت.. والدكتور سابها وراح اتجوز فنانة تانية..هل ممكن يكونوا اتجوزوا وماكنتش مجرد علاقة حب ف دا يسمحلها دلوقتي انها ترجع لحسام؟! ويبقى ماكنش غير جواز مصلحة من الطرفين.. دا عشان يتشهر مثلا ودي عشان تحلل رجوعها لحسام.. وكأن مش مكتوبلها غير حسام حبيب.. الفكرة انا متخيلة شيرين وهي في لحظة الرجوع يعني ياعيني بعد كل دا اكيد شايلة هم الناس هيشوفوها ازاي وهيقولوا عليها ايه..ووهي قاعدة بقى مع المأذون .. يابنتي لو مخطوفة اغمزي.. بس برضو اكيد لو دا فعلا حصل ف هيبقى عندها مبرراتها..التصريح الوحيد اللي طلع على لسان شيرين قالت فيه..  الجواز والطلاق أساسه الإشهار، فلو رجعنا هنعلن زي ما أعلننا قبل كده طلاقنا.. دلوقتي إحنا بنشتغل وبس.. السؤال هنا بقى..يابنت الحلال ايه اللي يخليكي تسيبي امة لا اله الا الله من الملحنين وتشتغلي مع اكتر واحد بينك وبينه مصانع الحداد وخناقات في الطيارات وصلت للضرب ! واصلا معظم المشاكل اللي حصلت بينهم على مدار جوازهم كانت خلافات بسبب الشغل! دلوقتي بقى اللي بيننا شغل وبس؟! 
مع ان اخر الاغاني أصلا اللي طرحتها شيرين مؤخرا كانت اغنية الدهب.. من كلمات تامر حسين وألحان مدين وتوزيع توما.. ودي اول اغنية طرحتها من البومها الجديد يوم 8 فبراير بعد غياب 3 سنين.. وبتستعد شيرين لشوية حفلات هتتعمل في العالم العربي بعد ما اتلغت حفلاتها مؤخرا بسبب احداث غزة.. يعني الحمدلله الست ناجحة وشغالة على نفسها.. تفتكروا اللي نشروا الشائعات دي ما هما الا أعداء نجاح؟.
كل اللي فات دا بقى حمادة.. واللي جاي دا بقى حمادة تاني خالص.. "ليلى عبداللطيف" خبيرة الابراج اللي توقعت قبل كدا في عز جو الحب والدباديب وبوستات اعياد الميلاد اللي دايرة ان ياسمين عبدالعزيز هتطلق من العوضي.. ولم يخفى الخبر .. وقد كان فعلا واتطلقوا هما الاتنين في حالة من الغموض والخضة اللي استغربها كل الناس.. بما فيهم اعتقد ليلى عبداللطيف نفسها.. قالت ليلى ايه بقى عن شيرين .. قالت " أنا بشوف شيرين عبد الوهاب هتستقر عاطفيًا، وهترجع شيرين اللي بنعرفها أول ما طلعت، مش هترجع لحسام حبيب تاني، وحتى لو رجعت.. هتسيبه" طبعا كذب المنجمون ولو صدقوا .. بس فعلا الموضوع بقى موتر وزايد عن حده.. والله اعلم هيحصل ايه لشيرين فعلا تاني بعد كدا..