أخبار محكمة الأسرة
محكمة الأسرة وحكايتها.. أسماء: جاب ورا وعايزني اتنازل عن القضية
زيادة نفقة سبب جعل «أسماء» تقصد محكمة الأسرة بعدما رفض طليقها زيادة المصروف للأولاد الثلاثة، لم ترغب في البداية في تصاعد الأمور ولكن إصراره على عدم زيادة النفقة بالتراضي جعلها تقصد محكمة الأسرة للمرة الثانية من أجل رفع دعوى زيادة نفقة عليه.
قصص محكمة الأسرة .. المشاكل زادت بعد الطلاق
تستهل «أسماء» رواياتها لقاضي محكمة الأسرة وتبرر لجوؤها للمرة الثانية في المحكمة وتبدأ قائلة: "اتطلقت منه بقالي خمس سنين عشان كان موريني الويل ومطلع عيني في كل حاجة وعلى طول خناق لحد ما جبت أخري واطلقنا فعلًا بعد 10 سنين جواز وأنا معايا 3 عيال"، مضيفة: "كنت فاكرة لما نتطلق الدنيا هتهدى بينا بس بقا يعند معايا ومش عايز يبعت مصاريف للعيال خالص. كلمته مرة واتنين بالزوق وبرضو مفيش فايدة فيه رحت رفعت عليه قضية نفقة واتحكم لي فيها بـ 900 للتلات عيال بس مبيعملوش حاجة".
حكايات محكمة الأسرة .. منفعش معاه الزوق
حاولت التفاوض مع طليقها من أجل زيادة المبلغ بسبب أنه لا يكفي مصروفات الأولاد الثلاثة ولكنه مصر على رفضه الإنفاق ما جعلها تلجأ إلى محكمة الأسرة للمرة الثانية من أجل رغبتها في زيادة النفقة، تابعت: "حاولت أمشي نفسي بالفلوس اللي بيدهالي بس مصاريف العيل كتير والـ 900 مش مكفيين أي حاجة، كلمته بالزوق بس هو مش راضي يزود مليم وبيقولي مش انتي روحتي المحاكم خليها تنفعك".
قضايا محكمة الأسرة .. أسماء في زيادة نفقة
كانت دعوى زيادة النفقة هي الحل لتاخذ حق أولادها بالقضاء، تستكمل أسماء رواياتها: "لم لقاني رحت المحكمة تاني عشتان أعمل زيادة نفقة خاف وجاب ورا وقال خلاص هزودلك مصروف العيال، بس انا مش ضمناه ومش هتنازل عن القضية"، تنهي أسماء روياتها: "بيحاول يجر ناعم معايا وبيكلمني كل وشوية عشان اتنازل عن القضية بس أنا مش هعمل كدا ووريني بقى هو هيعمل إيه"، لا تزال الدعوى منظورة في المحكمة حتى الآن.