أخبار محكمة الأسرة
محمد في قضية طاعة: بتقولي لو عاوزني نفذ شروطي وأولها تروق الشقة
على أبواب محكمة الأسرة تواجد «محمد» وظهر عليه الإرهاق والتعب بسبب الخلافات التي حدثت بينه وبين زوجته؛ والتي دمرت أسرته وحرمته من أولاده وعاشت حياتها بأمواله ومنعته من أن يكمل حياته بشكل طبيعي، كل ذلك بسبب تركها لأهلها للسيطرة عليها وعلى تصرفاتها، وكانت محكمة الأسرة هي المكان الذي تواجد فيه الزوج لسنين بسبب زوجته الذي حاول بكل الطرق أن يردها لعقلها ولكنها أصرت على تدمير حياته.
قصص محكمة الأسرة.. صالحتها عشان ابني ميتبهدلش
قال «محمد»: «أنا اتجوزت من 3 سنين ومخلف ولد الحياة بينا كانت عادية ومفيش خلافات؛ لحد مرة حصل بينا مشكلة كبيرة وقتها سابت البيت وكنا هنفصل ساعتها، بس صالحتها عشان خاطر الولد وعشان مخربش البيت ورجعت البيت فعلا وكنت فاكر ان مفيش مشاكل خلاص».
دعاوي محكمة الأسرة.. سمعت كلام امها و لمت البيت كله ومشيت
تابع «محمد»: «بعد فترة قليلة لما رجعت سيبتها الصبح عادي ورحت الشغل وكان مفيش حاجة ولما رجعت ملقتهاش في البيت، أمها قالتلها لمي حاجتك كلها من البيت وكل حاجة غالية في البيت خديها وراحت عند أمها، كلمتها عشان اعرف ايه اللي حصل قالت أنا عند ماما وملكش كلام معايا تاني وعايزني أرجع تيجي عندنا البيت وتقبل بشروطي».
قضايا محكمة الأسرة.. رفعت عليا كل القضايا عشان تاخد فلوسي
أكملت الزوج حديثه: «حاولت ارجعها عشان خاطر ابني وقلت عشان ميتبهدلش، وبعد ما اتكلمنا واتفقنا انها ترجع وصالحتها وقلت هعلمك اللي انتي عايزاه، بعد 3 أيام بس رفعت كل القضايا اللي ممكن ترفعها عشان تاخد مني فلوس ومنهم نفقة زوجية ونفقة صغار، ولما كلمتها قالت استحالة ارجعلك تاني».
حكاوي محكمة الأسرة.. رفعت عليها رؤية عشان منعاني عن ابني
تابع «محمد» حديثه وقال: «رفعت عليها قضية طاعة وكسبتها، وبعدين رفعت قضية نشوز قالت قدام القاضي انها هتروح، وخرجت من باب المحكمة قالتلي روق الشقة عقبال ما أجي عشان تستفزني ومشيت ومرجعتش، ولقيتها عملت محضر إني مرضتش ادخلها البيت وده محصلش، مش مخلياني اشوف ابني ورفعت قضية رؤية عشان أقدر أشوف ابني واربيه لأنها منعاني عنه من ساعة ما مشيت».