أخبار محكمة الأسرة
محكمة الأسرة.. خلود بدعوى نفقة: نزواته دمرت حياتنا ومبيصرفش مليم غير بالمحاكم
قصدت «خلود» محكمة الأسرة لتبحث عن حقوقها وتجد حل لمشكلتها التي عاشت فيها لسنين مع زوج لم يقدرها وخدعها طوال سنين زواجهم وكنت علاقاته المتعددة هي أهم أمر في حياته، وترك زوجته وأبنه دون سؤال أو اهتمام وترك نزواته تدمر بيته وأسرته ولم يكفيه ما فعله أثناء زواجه مع زوجته وابنه ولكن استمر في أذيته لزوجته وابنه حتى بعد انفصاله عن الأم.
قصص محكمة الأسرة.. اتجوزت حب الجامعة
قالت «خلود»: «أنا متجوزة من 2013 سايبه جوزي من 2017، اتعرفت على جوزي في الجامعة حبينا بعض واتجوزنا بعد ما خلصنا جامعة على طول، بعد الجواز على طول خلفت منه ولد والحياة كانت ماشية ومفيش مشاكل وكنت فرحانة إني اتجوزت اللي بحبه وان خلاص بقى عندي بيت وأسرة».
دعاوي محكمة الأسرة.. لقيت رسائل على تليفون جوزي من ستات تانية
تابعت «خلود»: «في أول الجواز مكنش في مشاكل بيني وبين جوزي والحياة كانت ماشية وعادية حتى المشاكل انت الطبيعية وبنحلها على طول سوا، لحد ما كنت بلاقي على تليفونه رسائل من ستات تانية، كنت بكدب نفسي في الأول بس الموضوع اتكرر كذا مرة، كنت لما بكتشف أروح أواجهه ومينكرش».
قضايا محكمة الأسرة.. كرامتي اتهانت بسبب جوزي
أكملت الزوجة حديثها: «اكتشفت إنه بيعرف عليا ستات من زمان، ووصل بيه الأمر أنه بيخرج معاهم قدامي وميخبيش حتى، حاولت معاه إنه يتعدل لكن مفيش فايدة كنا طول الوقت في خناقات بسبب الموضوع ده، لحد ما تعبت منه ومن كرامتي اللي بهدلها وقررت اسيبه، محاولش يرجعني من ساعة ما سيبته خلاص كل واحد شاف حياته».
حكاوي محكمة الأسرة.. مبيصرفش غير بالمحكمة
أنهت «خلود» حديثها وقالت: «اتطلقنا بقضية عن طريق المحكمة لأنه رفض يطلقني ودي وقالي اعملي اللي عندك، بعد ما سيبته دفع النفقة سنة واحدة بس وبعدين قطع خالص، مش عايز يصرف من ساعتها مبيصرفش غير لما أروح المحكمة بس وأرفع عليه قضية، رافعة قضية النفقة من 2019، بس بقاله كتير متأخر في الدفع ومبيسألش خالص، جيت المحكمة عشان أرفع عليه حبس بمتجمد نفقة، مش عايزه أحبس أبو ابني بس هو اللي اضطرني إني أعمل كده».