«بيتكيف على قفايا».. منار في دعوى طلاق: بيسرق مرتبي عشان يجيب مخدرات
توجهت “منار” نحو مجمع محاكم شبر من أجل رفع قضية طلاق ضد زوجها المستهتر الذي تكاسل العمل دون سبب واعتمد على مرتب زوجته، وبعد فترة اتجه للمخدرات التي كانت السبب في تعقيد الأمور أكثر من اللازم وإنهاء حياتها الزوجية برفع دعوى طلاق.
تستهل منار حديثها وأول ما قالته هو: “أنا اللي شايلة البيت من ساعة ما اتجوزنا وبقول مش مهم عشان احافظ على بيتي وعيال ومش مهم أي حاجة تانية”.
تابعت الزوجة قائلة: "في أول سنة جواز لقيته قعد من الشغل من غير أي سبب، خناقات كتير حصلت بينا عشان يرجع شغله بس هو مش راضي، واخر ما زهقت سبته وقلت أنا اللي هصرف على البيت".
شايلة البيت لوحدي من ساعة اتجوزت
أنجبت طفلها الأول وظنت أن الأمور تستقر ولكن في الحقيقة تعقد كل شئ وتصاعدت المشكلات بسبب لا مبالاة الزوج التي تزداد يومًا بعد يوم، أضافت منار: "كنت فاكرة الدنيا هتتحسن بينا بعد ما اخلف وقلت خلاص هيتعدل ويرجع الشغل عشان خاطر ابنه، بس زود الطينة بلة وعرف طريق المخدرات وحياتنا باظت اكتر ما هي بايظة"، تستكمل منار رواياتها قائلة: "كنت بقول مش مشكلة اشيل مصاريف البيت عشان معملش مشاكل وأخرب البيت، بس هو معندوش دم وبدل ما يفكر في بيته وابنه رايح يشرب ويضيع نفسه، طبعًا المشاكل كترت بينا بسبب المخدرات بس هو ولا هنا".
بيسرق المرتب من ورايا
أصبحت الزوجة متولية مصروفات المنزل علاوة على تكاليف زوجها ومزاجه الذي أهدر مرتبها الشهري، تروي لنا باقي تفاصيل قصتها قائلة: “بقيت شايلة مصاريف البيت ومصاريف شربه كمان، بقى مخلص كل فلوسي على كيفه ولو مرضيتش اديله فلوس بيسرق المرتب من ورايا”.
اختتمت رواياتها وقالت: "مخلص فلوسي كلها على مزاجه وكيفه ومبيفكرش في ابنه ولا فيا، تعبت من العيشة اللي أنا عايشاها معاه، طلبت منه الطلاق اكتر من مرة بس هو مش راضي، ملقتش حل غير إني ارفع عليه قضية طلاق"، كانت محكمة الأسرة هي الحل الأخير لتنقذ منار من حياتها التعيسة مع زوجها الذي يعتبر عالة عليها.