«زي ما دخل الدنيا خرج منها».. صباح: اطلقت عشان ظروفه المادية ولما مات طلع مفلس
فشلت العلاقة بين «صباح» وزوجها ولم تكتمل بسبب ظروف الزوج المادية الصعبة، فبعد سنين عديدة من العشرة قررت أن تترك الزوجة زوجها عندما وجدت أن ظروف حياتهم من الصعب عليها تحملها.
صباح: اطلقت عشان ظروفه المادية ولما مات طلع مفلس
كان قرار الانفصال صعب تنفيذه على «صباح» لكنها كانت مضطرة أن تترك زوجها من أجل أن تحاول ان تعطي أبنائها مستقبل أفضل، وكان هذا القرار بعد سنين عاشتها الزوجة مع زوجها الذي لم يكن زوج أو أب سيء ولكن رجل ظروفه المادية صعبة، ولم تعلم «صباح» أن بعد طلاقها من زوجها سوف يتوفى ويترك أولادها يتامى وهي مسئولة أن تتحمل مسئوليتهم كامله بمفردها، واضطرت في النهاية أن تلجأ لمحكمة الأسرة من أجل أن تعطي أبنائها حقهم.
ظروفه صعبة من ساعة ما اتجوزنا
قالت «صباح»: اتجوزنا أنا وجوزي من 23 سنة، وخلفت منه 3 عيال، هو كان كويس معايا وكويس مع عياله، مشكلته بس إن ظروفه المادية صعبة، الأول كنت بتحمل وبمشي الدنيا، لكن الولاد كبروا والمصاريف كترت وبقوا عايزين فلوس للدروس والمدرسة وهو مكنش معاه، العيشة بقت صعبة أوي وصلنا لدرجة مش لاقيين الأكل.
لو معاه جنية بيصرفوا على عياله
أكملت الزوجة: لحد ما اتطلقنا من سنة عشان ظروف المعيشة الصعبة، بعد 23 سنة جواز كنت مضطرة اسيبه عشان أقدر أخد بالي من ولادي وأصرف عليهم، مكنش في بينا مشاكل من بعد الطلاق كان بيجي ويشوف ولاده ويسأل عليهم، هو مكنش في إيده حاجة يعملها ظروفه هي اللي صعبة وكان لو معاه ايه بيصرفوا على عياله.
أهل جوزي المتوفي مش بيسألوا فينا
أضافت «صباح»: لحد بعد الانفصال بفترة اتوفى، مات فجاه مكنش تعبان أو حاجة، كانت صدمة كبيرة عليا وعلى ولادي، فجأة بقوا يتامى، وبقيت أنا اللي مسؤولة عنهم لوحدي، ومن ساعة وفاته وأنا بلف في المحاكم عشان أقدر أخد المعاش لولادي، عشان أقدر أصرف عليهم، هو مات ومسابش حاجة يبقى ليها ورث، وأهله مبيسالوش فينا ولا وقفوا معانا من ساعة ما مات، معملوش مشاكل معانا لأن مفيش ورث ولا حاجة .