البيت بقى غرزة حشيش.. دينا للقاضي: كل الناس حذرتني منه حتى أمه
حب الطفولة والشباب، دام لأكثر من 13 عاما بين فتاة وشاب كانت كل أحلامهما أن يجمعهما عش زوجية واحد ويعيشان حياة سعيدة ومستقرة ولكن الزوج هدم كل الأحلام الوردية بسبب المخدرات التي اتجه الزوج إليها بطريقة مفرطة بعد الزواج جعلته غير مهتم بزوجته وبيته، فكانت تحاول الحفاظ على حب حياتها ولكن فقدت سيطرتها ما دفعها تلجأ لرفع دعوى طلاق.
بنحب بعض من 13 سنة
حاولت «دينا» كثيرا أن تتعامل مع الواقع الجديد وتصلح الحال بينها وبين من اختارته ولكن دون جدوى وزادت الأمور سوءا مع مرور الوقت ولم تعد تتحمل أكثر من ذلك، بدأت الزوجة تروي قصتها للقاضي قائلة: "اعرفه من 13 سنة وكنا بنشتغل مع بعض وحبينا بعض من زمان وقال إنه عايز يتجوزني وأنا طبعا كنت موافقة بس أهلي كانوا شايفينه مش كويس ومينفعش اتجوزه".
تابعت: "رفضوا في الأول عشان كانوا عارفين إنه بيشرب مخدرات، بس لما لقوني مصممة وافقوا عشان يرضوني بس، حتى أمه قالت لي في الخطوبة سيبك منه دا مش كويس ومحشش ومكنتش أعرف إني هشوف معاه المر دا كله".
كنت بحلم باليوم اللي هتجوزه فيه
حلمت «دينا» باليوم التي تسكن فيه مع حب حياتها في منزل الزوجية، ولكن الحياة لم تكن وردية مثل ما رسمت في خيالها، وبعد بضعة شهور قليلة تحولت حياتها لتعاسة بسبب إدمان الزوج للمخدرات وتغير والدته ما أدى لمشكلات كثيرة كانت تحاول الزوجة التغاضي عنها من تأجل الحفاظ على حب حياتها ولكن ضربه المستمر لها جعلها تصر على الانفصال.
أضافت: "أول كام شهر كنا كويسين وكل حاجة تمام بس بقى زاد في شربه للمخدرات والبودرة، ومن ساعتها وهو بقى واحد تان معاي خالص على طول ضرب وقلة أدب والخناقات زادت أوي، والشقة بقت غرزة حشيش وكل شوية أغضب عن بيت أهلي".
أمه خليته يسيب الشقة
تابعت : "حملت وخلاص قربت أولد وأنا كنت تعبانة ورحت عند أمي أقعد معاها وعرفت إنه سدد بقية فلوس إيجار الشقة ومشي منها خلاص، ولما كلمت أمه قالت لي هندخله المصحة ولما يطلع هنجيب لكم شقة"
أكملت حديثها: "خلفت وهو مجاش يشوف حتى ابنه وأنا كل دا قاعدة عند أمي وكل ما أكلمه يقول لي مش فاضي، وميعرفش شكل ابنه وهو خلاص هيتم السنة أهو، كلمت أمه تاني على موضوع الشقة قالت لي لسه مدخلنهوش المصحة".
أنهت دينا قصتها: "أمه استنت لما أنا أمشي من البيت عشان تسيب الشقة اللي احنا مأجرينها ومش عارفة عفشي وهدومي رحوا فين، وهو مبيعملش حاجة كل اللي همه القرف اللي بيشربه وبس، مقدرتش استحمل وجيت أرفع دعوى طلاق وماشية في الإجراءات بقالي شهرين".