سعاد في دعوى طلاق: "باع كل حاجة في البيت عشان المخدرات"
سنوات ضياع عاشتها “سعاد” في عش الزوجية على حسب وصفها وهي تروي قصتها، بسبب زوج لا يراعي ربنا فيها ويتهاون في ضربها وإهانتها طوال الوقت، ما جعلها تلجأ للقضاء بعدما فشلت في التعايش معه نتيجة أخذ كل المصروفات وضياعها على المخدرات.
5 سنين من السعادة في عش الزوجية
حياة زوجة فاشلة تعيسة بعدما كان ينعم عش الزوجية بالاستقرار والهدوء، وكل هذا كان السبب الرئيسي فيه هي المخدرات، تابعت: "أول خمس سنين كانت حياتنا زي الفل ومفيش أي حاجة وهو كان ملتزم في شغله وبيعمل لي كل حاجة، بس فجأة اتحول واحد تاني خالص مبيعملش حاجة غير إنه بياخد كل الفلوس اللي بيشتغل بيها ويجيب بيها مخدرات".
أضافت “سعاد”: "في الأول كنت بحسب بيشربها تفاريحي كدا بس لقيت شربه بيزيد وبقا أساسي كل يوم القرف دا ولما أجي اٌقوله عايزة فلوس يقول لي مش معايا وهو مضيع كل فلوسه على المخدرات ومبيصرفش على أنا وابني".
أكدت سعاد على إدمانه المفرط للمخدرات حتى وصل لمرحلة أنه ينفق مرتبه الشهري على المخدرات دون الالتفات لمتطلبات زوجته وابنه، تابعت الزوجة: "مبقاش بيشوف قدامه أي حاجة خالص ولو جيت أكلمه هو عايز يشرب يروح ضاربني، ومبشوفش منه ولا جنيه وبقيت أروح عند أمي عشان نتغدى عندها أنا وابني".
سرق باب الشقة عشان يجيب مخدرات
أضافت: "بقيت ألاحظ حاجات كتير بتختفي من البيت عشان الزفت اللي بيشربه وكل ما أجي قوله أنت اللي بتسرق الحاجات دي يقول لي لا وأنا كنت بصدقه عادي".
أكملت حديثها قائلة: "لما لقيت كل يوم حاجة بتختفي من البت بدأت اشك إنه اللي بيسرق الحاجات دي، واتأكدت لما شفته بعيني، في يوم كنت راجعه من برا ولقيته بيفك باب الشقة عشان عايز فلوس يجيب بيها المخدرات".
بدأ القلق يحاوط سعاد من كل ناحية بسبب زوجها الذي سرق كل شيء من أجل شراء مزاجه دون النظر لأي شيء أخر ورفعت دعوى طلاق منذ 3 شهور، ولا تزال القضية منظورة في المحكمة حتى الآن.