بسنت في دعوى ضم حضانة: "خد البنت عِند ومراته صبحتها ومستها بعلقة"
دعوى ضم حضانة لجأت إليها بسنت بعدما لاحظت علامات الضرب على جسد ابنتها التي لا تتعدى سبع سنوات من قبل مرات أبيها، وذلك بعد إصرار الأب على أخذ ابنته بمجرد معرفته بزواج أمها، وإن كان لا يعرف أي شيء عنها منذ الانفصال وتركها لأمها، إلا أنه العند فقط.
"خد بنتي مني بالعافية" بهذه الكلمات بدأت بسنت حديثها عن سبب الخلاف مع طليقها، مؤكدة أخذه ابنتهما دون رضاها.
أضافت بسنت خلال حديثها عن دعوى ضم حضانة الابنة: "محصلش بينا نصيب في الجواز واتطلقنا بعد خمس سنوات بسبب معاملته اللي زي الزفت معايا وحصلت مشاكل كتير بسببها وكل مرة كان بيقول خلاص هبطل عصبية والمعاملة دي بس برضو مبيتغيرش"، لافتة: "مقدرتش استحمل المعاملة دي وطلبت الطلاق بس هو كان رافض بس أهلي اتكلموا معاه اقتنع وطلقني فعلًا، وكنت فاكرة خلاص هخلص من المشاكل بس لقيته زادت".
زيادة المشكلات بعد الطلاق
ظنت «بسنت» أن المشكلات تختفي من حياتها بمجرد الانفصال ولكنها مخطئة، لأن الأمر في ازدياد من بعد الطلاق لتصميم الأب على أخذ البنت وتربيتها بدلًا منها، في بداية الأمر رفضت لكنها وافقت في النهاية بحكم أنه والدها ومن المستحيل أن يفكر في معاملتها بطريقة سيئة.
أكملت المدعية حديثها: "قعد بعد الطلاق ميعرفش حاجة عن بنته لمدة سنة أو أكتر ومكنش بيبعت حتى جنيه واحد ليها وأنا كنت بقول طالما بعيد عننا خلاص وأنا كدا كدا كنت بشتغل ومش محتاجة منه حاجة".
تابعت: "هو اتجوز بعد سنة ونص وبرضو ميعرفش أي حاجة عنها، وأنا كمان اتجوزت بعده بكام شهر وأول لما عرف إني اتجوزت جالي البيت وعمل مشكلة وقال لي انتي ازاي تتجوزي وانتي عندك بنت ملزمة إنك تهتمي بيها وتربيها كويس".
وشددت: "خد مني البنت بالعافية ومشي وقال لي هتعيش معايا ومش هتشوفيها، أمي قالت لي بلاش تعملي مشاكل وهو كمان أبوها أكيد مش هيعمل فيها حاجة وحشة، سمعت كلام أمي وقلت خلاص هستني كام يوم كدا وهشوف إيه اللي هيحصل".
ضرب زوجة الأب للطفلة
تركت الابنة في بيت والدها لترى ما الذي يحدث، لتتفاجأ أن زوجة والدها تقوم بضربها كل يوم دون علم الأب ما جعلها تلجأ لمحكمة الأسرة لرفع دعوى ضم حضانة بسبب خوفها على ابنتها.
تابعت «بسنت»: "بنتي قعدت عنده أسبوع وكنت بكلمها كل يوم وكانت بتقولي أنا كويسة قلت الحمد لله، بس لما جت لقيت جسمها كله معلم من الضرب، ولقيتها بتقولي كانت بتضربني كل يوم وبتقول لي اوعي تقولي لحد عشان كدا كنت بخاف أقولك إنها بتضربني".
أنهت حديثها: "لما شفت بنتي كدا طلعت على طول على محكمة الأسرة ورفعت دعوى ضم حضانة بقالي شهر عشان أخلي بنتي معيا ولسة ماشية في الإجراءات أهو".