كان كسيب | حنان في دعوى خلع: صحابه جروه لطريق المخدرات والسرقة
دعوى خلع هي ورقة من ورقات الخلاص التي تلجأ إليها زوجات كُثر لا تردن سوى العش بسلام والمحافظة على بيتها، ولكن الأزواج تدمر أحلام زوجاتهن لأسباب كثيرة منها انسياقه وراء أصحاب السوء، فتحول عش الزوجية لكابوس من خلال إدمانه للمخدرات، وينتج عنها تصرفات كثيرة غير أخلاقية منها السرقة والضرب المبرح الذ ي يصل في بعض الأحيان إلى قتل.
حنان في دعوى خلع: صحابه جروه لطريق المخدرات والسرقة
"جوزي واخد حكم بـ 25 سنة" هكذا بدأت حنان حديثها تروي قصتها للقاضي، مؤكدة على معاملة زوجها الجيدة لها في الفترة التي قضتها معه في عش الزوجية، أضافت: "عمرو كان جارنا واتقدملي واتخطبنا وكان كويس معايا في فترة الخطوبة وحبيته وبعدها اتجوزنا وكان بيعاملني كويس في أول سنة في الجواز وربنا رزقنا بأحمد"
تابعت: "كان شغال صنايعي وكان أيام بينزل الشغل وأيام لا وشوية يبقى معانا فلوس وشوية لا بس الحمد لله كانت مستورة وكنت بحمد ربنا، بس من ساعة ما اتلم على صحابه السوء وهما ودوه في داهية".
أصحاب السوء السبب وراء خراب عش الزوجية
لم تهتم الزوجة لأي شيء سوى أنها تربي طفلها وتحافظ على أسرتها وعش الزوجية الصغير ولكن الزوج انساق وراء أصحابه في طريق المخدرات والسرقة ومن هنا انقلب عش الزوجية السعيد لكابوس كبير، أضافت: "في السنة التانية من الجواز بدأ يتغير ويبقى عصبي طول الوقت واكتشفت إنه بقا يشرب مخدرات وحاله اتبدل من ساعتها ومبقاش جوزي اللي أنا عرفاه وبدأت الخناقات والمشاكل بسبب الموضوع دا".
تابعت: “كنت بحسب الموضوع في المخدرات، بس اكتشفت إن صحابه جروه لطريق السرقة كمان وأقنعوه إنه يسرق عشان معهوش فلوس، واتقبض عليهم كلهم بتهمة تشكيل عصابي وخدوا 25 سنة سجن، وهو محبوس دلوقتي بقاله سبع سنين”.
أكملت: "أول ما جوزي اتحبس مكنتش عارفة أعمل إيه، أهلي قالوا لي تعالي اقعدي معانا وفعلًا رحت عندهم وفكرناش في الانفصال على أساس إنه ممكن ميقعدش مدة السجن كلها، بس لما لقيت إنه هيقضي المدة كلها قولت لأهلي إني عايزه ارفع قضية خلع قالولي معندناش الكلام دا"، مختتمة: "صممت على الخلع وبالعافية أهلي وافقوا إني ارفع القضية ورفعتها فعلَا بقالي خمس شهور.